Category: Հայտարարություններ
Published on 27 October 2013
Print

Հռոմում եմ։ Տիրոջ կամքով երկու-երեք ժամից կլինեմ Փարիզում։ Մէկ-երկու օրից էլ կլինեմ Բրիւսելում՝ ստուգումների եւ բուժումների։ Յուսամ, ստիպուած չեմ լինի երկար մնալ։
Թբիլիսիում  այցելեցի ընկերներիս՝ Մերաբի եւ Գիայի շիրիմներին. հանդիպեցի հնի ընկերներիցս Աւթանդիլին ու Մամուկային։ Միասին ընթրեցինք եւ հաճելի ու օգտակար զրոյց ունեցանք։
Իմացայ, որ ինձ փողասէր լինելու մէջ մեղադրող տիկնոջ ամուսինը ինձ նամակ է գրել ու դրամ է ուզում։ Առաջին տպաւորութիւնս՝ ինչպէ՞ս կարելի է չիմանալ, որ իրական փողասէրն իր կողքին է։ Աւել ոչինչ չեմ ասի, մինչեւ չծանոթանամ հանգիստ մթնոլորտում։
 
Category: Հայտարարություններ
Published on 24 October 2013
Print

Չարիքի դաշնակիցները սուտն ու կեղծիքն են։ Ես ուրախ եմ, որ կրքեր բորբոքուեցին ու մոլորութեան մէջ գցուած մարդիկ սթափ վերլուծութիւններ կատարելու հնարաւորութիւն ստացան։ Հստակ յայտարարել եմ՝ նա, ով ասում է կամ ասում էր, որ յունուարի 31-ին իմ վրայ կրակոց չի եղել, նա սրիկայ է։ Ուրիշ ոչինչ․ խօսքս որոշակի փաստի եւ միայն փաստի մասին է։ 
Եթէ մէկը չի ենթարկուել դաւադիրների խաղերին ու նման բան չի ասել, մտահոգուելու բան չունի։ Իսկ եթէ ասել է ու չի զղջացել իր ստի համար, ուրեմն իսկապէս սրիկայ է։ Եւ սա ասելն իմ պարտքն էր։ Թող հրապարակաւ ասեն, որ սխալուել են, որ ընկել են ազեցութեան տակ ու զղջում են, եւ ես ինքս ներողութիւն կխնդրեմ խիստ արտայատուելուս համար․․․Թէ չէ, ի՞նչ է ստացւում․ իրենք կարող են օտար պետութեան պաշտոնեայի հրահանգով ինձ վիրաւորել, իսկ իրենց կարգի հրաւիրելս անթոյլատրելի՞ են համարում, այսինքն՝ ես ինձ սրիկաներից պաշտպանելու իրաւունք չունե՞մ։ («Կրակոց չի եղել», նշանակում է՝ ես ամենայետին արարածն եմ, որովհետեւ ստել եմ ու խաբել հարազատներիս, ընկերներիս, ոստիկանութեանը, բժիշկներին, կարճ ասած՝ ամբողջ աշխարհին)։
Իսկ այդ կնոջ հիստերիային չեմ անդրադառնայ․ միայն խորհուրդ կտամ իր «երկարալեզու» ամուսնու պաշտպանութեամբ ասպարէզ գալիս նկատի ունենայ, որ լրացուցիչ խայտառակում է նրան։

 
Category: Հայտարարություններ
Published on 19 October 2013
Print
ԱԻՄ ՅԱՅՏԱՐԱՐՈՒԹԻՒՆԸ
ԿԱՐՕ ԵՂՆՈՒԿԵԱՆԻ ԵՒ ԱՅԼՈՑ ՆԿԱՏՄԱՄԲ ՔՐԵԱԿԱՆ ԴՐՍԵՒՈՐՈՒՄՆԵՐԻ ՎԵՐԱԲԵՐԵԱԼ
                                                                                                                    19 Յոկտեմբերի 2013թ.
 
     Ազգային ինքնորոշում միաւորումը մտահոգուած է վերջին շրջանում քաղաքացիական նախաձեռնութիւնների մասնակիցների նկատմամբ իրականացուող տարբեր անհատների կամ խմբերի քրեական՝ խուլիգանական դրսեւորումներով։
     Ցանկացած պետութիւնում լինում են տարրեր, որոնք առաջնորդուելով իրենց «շահերով» ու նկատառումներով, հանդէս են գալիս հակաօրինական գործողութիւններով։ Նման երեւոյթները կանխուելու համար պետութիւնները,  ինչպէս եւ Հայաստանը, ունեն քաղաքացիների, այդ թւում՝ հարձակումների ենթարկուող հարկատու-քաղաքացիների միջոցներով գործող իրաւապահ մարմիններ։
     Պետութեան գլխաւոր առաքելութիւնը քաղաքացիների, մանաւանդ գործուն քաղաքացիների անվտանգութեան ապահովումն է։ Արդէն պարբերական դարձող, մասնաւորապէս՝ Կարո Եղնուկեանի նկատմամբ,  արատաւոր դրսեւորումները եւ բռնարարքները ստիպում են խորհել իրաւապահ մարմինների անկարողութեան կամ անտարբերութեան մասին։
     ԱԻՄ ներկայացուցչական խորհուրդը իշխանութիւններին կոչ է անում վճռական քայլեր ձեռնարկել նման երեւոյթները կանխելու ուղղութեամբ, այլապէս իրենք՝ իշխանութիւնները, կընկալուեն որպէս քրեական տարրերի պաշտպան ու հովանաւոր։
   
ԱԻՄ ՆԵՐԿԱՅԱՑՈՒՑՉԱԿԱՆ ԽՈՐՀՐԴԻ ԱՆՈՒՆԻՑ
 
ԱԻՄ առաջնորդ   Պարոյր Հայրիկեան 

 

 
Category: Հայտարարություններ
Published on 10 October 2013
Print

Գաղափարներ ու ուղիներ են որոնում, խօսում իշխանափոխութեան անհրաժեշտութիւնից։ Մինչդեռ բոլորիս համար պարզ է, որ այս փուլի կարեւորագոյն խնդիրը ոչ թէ իշխանափոխութիւնն է կամ որեւէ ուրիշ նպատակ, այլ իշխանութեան փոխանցումը ժողովրդին։ Ժողովրդին եւ ոչ այս կամ այն անհատին, կուսակցութեանը կամ այլ հաւաքականութեան։ Այս նպատակի իրականացման եւ իրականացումից յետոյ որպէս համակարգ ամրագրման ամենակարճ ճանապարհը Հայաստանում ԲԱՑԱՐՁԱԿ ԺՈՂՈՎՐԴԱՎԱՐԱԿԱՆ ՀԱՄԱԿԱՐԳԻ հաստատումն է։ Սա է հարցերի հարցը։ Ինչով էլ զբաղուենք, ինչ նպատակ էլ իրականութիւն դարձնենք, ժամանակաւոր է ու ժամանակավրէպ, եթէ գլխաւոր խնդիրը լուծուած չէ, եթէ իշխանութեան տէրը չեն դարձել քաղաքացիները։ Այս գաղափարը ոչ մի կուսակցութիւն չի մերժել եւ այն արդէն արժանացել է վեց կուսակցութիւնների լիակատար աջակցութեանը։ Ուստի կոչ եմ անում բոլորին, բոլոր հայերին ու հայաստանցիներին միանալ Յանուն բացարձակ ժողովրդավարուեան սկսուած ստորագրահաւաքին։ 

Հինգշաբթի օրը ժամը 17։00-ին ԲԱՑԱՐՁԱԿ ԺՈՂՈՎՐԴԱՎԱՐՈՒԹԵԱՆ (ԲԺ) կողմնակիցներով հաւաքուելու ենք քննարկելու նախնական ստորագրահաւաքի ընթացքը։ Սա է կից գրութիւնը։ Արդէն բազմացուած է․ 


ՍՏՈՐԱԳՐԱՀԱՒԱՔ Ի ՆՊԱՍՏ ԲԱՑԱՐՁԱԿ ԺՈՂՈՎՐԴԱՎԱՐԱԿԱՆ
ՀԱՄԱԿԱՐԳԻ 

2013թ. Հայաստան

ԲԱՑԱՐՁԱԿ ԺՈՂՈՎՐԴԱՎԱՐՈՒԹԵԱՆ ՀԱՄԱԿԱՐԳԸ կաւելացնի քաղաքացու կշիռը քաղաքականութեան մէջ եւ կամրագրի քաղաքական գործիչների կախուածութիւնը քաղաքացիներից։ 
Պետական համակարգը կազատուի ուռճացումից. Հայաստանում, օրինակ, կը վերանայ նախագահի պաշտօնը, եւ կը կրճատուի պատգամաւորների քանակը, ընդհուպ, մինչեւ 81-ի։ Գործադիր իշխանութեան ղեկավարին՝ վարչապետին, ու նրան փոխարինողին՝ փոխվարչապետին, կընտրի ժողովուրդը։ 
Օրէնսդիր մարմինը՝ խորհրդարանը, կը դառնայ քաղաքացիներին լիարժէքօրէն ներկայացնող հաստատութիւն։ Ընտրութեանը մասնակցած որեւէ քաղաքացու ձայն դուրս չի մնայ խորհրդարանից։ Չընտրուած թեկնածուներն իրենց ստացած ձայներն իրաւունք կունենան փոխանցել ընտրուած թեկնածուներին։ Խորհրդարանականը կընտրուի երկու տարով եւ խորհրդարանականները կը քուէարկեն ոչ թէ մէկական ձայնով, այլ քաղաքացիներից ստացած քուէների քանակով։ Քաղաքացին ի վիճակ կը լինի յետեւել, թէ ինչպէս է օգտագործւում իր ձայնը եւ ըստ այնմ եզրակացութիւններ կանի։ 
Սկսուած ստորագրահաւաքը կարող է նպաստել ԲԱՑԱՐՁԱԿ ԺՈՂՈՎՐԴԱՎԱՐՈՒԹԵԱՆ ներդրմանը մեր երկրում, որի արդիւնքում Հայաստանը կը դառնայ այլ պետութիւնների համար օրինակելի ամենաժողովրդավարական երկիրը։ Գործի կարեւորութիւնն ընդունողները, անկախ իրենց տարիքից, սեռից, հաւատից, ազգութիւնից եւ կուսակցական պատկանելութիւնից, կարող են միանալ այս նախաձեռնութեանը՝ զանգահարելով 010 36 94 46, 094 91 81 24 կամ 094 91 81 23 կամ այցելելով demos.am կայքէջ։

 
Category: Հայտարարություններ
Published on 04 October 2013
Print

Ես ընդհանուր առմամբ գոհունակութեամբ նայեցի ԵԽԽՎ-ում Սերժ Սարգսեանի հանդիպումը, բայց ինձ մտահոգեց յատկապէս այն յատուածը, որը ամենից աւելի էին հաւանել մեր սիրելի հայրենակիցները։ Այո, եւրոպացիներին հաճելի է տեսնել զսպուածութիւն եւ դա, իհարկէ, բոլորս պիտի հաշուի առնենք, բայց դա չպէտք է հանգեցնի ինքնամոռացման եւ նոյնիսկ ինքնամերժման։ Եթէ այդպիսի ամբիոնները ճիշտ չօգտագործենք մեզ համար ռազմավարական նշանակութիւն ունեցող խնդիրները մատուցելու, համաշխարհային հանրային կարծիքի ձեւաւորմանը նպաստելու ուղղութեամբ, ապա ի՞նչ ամբիոններ ենք օգտագործելու։ Շեշտել, որ մենք առանց նախապայմանների պատրաստ ենք Թուրքիայի հետ բարի-դրացիական յարաբերութիւնների, ինձ համար դժուարութեամբ հասկանալի էր հենց նախնական փուլում, բայց այժմ՝ տարիներ անց, ակնյայտ ձախողումից յետոյ չօգտուել ԱՅԴ ԼԱՒ ՓՈԽԱՆՑՈՒՄԻՑ, սա չեմ հասկանում։ Ժամանակն է, գոնէ խմբագրելու մօտեցումը։

Ադրբեջանցու՝ Թուրքիային տարածքային պահանջներ էք ներկայացնում, յայտարարութեանը պէտք է հետեւեր մօտաւորապէս այսպիսի պատասխան. ՑԵՂԱՍՊԱՆՈՒԹԻՒՆ ԱՊՐԱԾ ԺՈՂՈՎՈՒՐԴԸ, ՆՐԱ ԻՇԽԱՆՈՒԹԻՒՆՆԵՐԸ ՊԱՐՏԱՒՈՐ ԵՆ ՄՇՏԱՊԷՍ ՈՒՇԱԴՐՈՒԹԵԱՆ ԿԵՆՏՐՈՆՈՒՄ ՊԱՀԵԼ ՑԵՂԱՍՊԱՆՈՒԹԵԱՆ ԵՒ ԴՐԱ ՀԵՏԵՒԱՆՔՆԵՐԻ ՎԵՐԱՑՄԱՆ ՀԱՐՑԸ։ ԲՈԼՈՐԴ ԷՔ ՎԿԱՅ, ՈՐ ՀԱՅԱՍՏԱՆԻ ԻՇԽԱՆՈՒԹԻՒՆՆԵՐԸ ՆՈՅՆԻՍԿ ԱՅԴ ՀԱՐՑԸ ՉԵՆ ԲԱՐՁՐԱՑՐԵԼ։ Մենք չենք խօսել նաեւ այն բանի մասին, որ Հայաստանի միջազգայնօրէն, նաեւ Թուրքիայի կողմից ճանաչուած տարածքների 80 տոկոսը բռնազաւթուած են Թուրքիայի եւ Ադրբեջանի կողմից։ Մենք այդ ամենը մոռանում ենք յանուն բնականոն յարաբերութիւնների հաստատման եւ գնացինք առանց նախապայմանների յարաբերութիւններ սկսելու ճանապարհով։ Դա նաեւ միջազգային հանրութեան ցանկութիւնն էր, բայց ինչպէս գիտէք, թուրքական իշխանութիւնները տապալեցին այդ նախաձեռնութիւնը։ 

Գրածս ետին թուով արուած առաջարկ չէ։ Տարիներ շարունակ խօսում եւ գրում եմ՝ ՑԵՂԱՍՊԱՆՈՒԹԵԱՆ ՀԵՏԵՒԱՆՔՆԵՐԸ ՎԵՐԱՑՆԵԼՈՒ ՄԵՐ ՍԵՐՆԴԻ ԳԼԽԱՒՈՐ ԱՌԱՔԵԼՈՒԹԵԱՆ, ՄԻՋԱԶԳԱՅՆՕՐԷՆ ՃԱՆԱՉՈՒԱԾ (ՈՉ ՍՏԱԼԻՆԻ ԳԾԱԾ ՍԱՀՄԱՆՆԵՐՈՎ) ՀԱՅԱՍՏԱՆԻ ՏԱՐԱԾՔՆԵՐԻ 80 ՏՈԿՈՍԻ ԲՌՆԱԶԱՒԹՈՒԱԾ ԼԻՆԵԼՈՒ, ԻՆՉ-ՈՐ ԿԵՐՊ ՊԱՀԱՆՋՆԵՐԸ ՀՆՉԵՑՆԵԼՈՒ ԵՒ ՄԻԱՅՆ ԴՐԱՆԻՑ ՅԵՏՈՅ ԱՌԱՆՑ ՆԱԽԱՊԱՅՄԱՆՆԵՐԻ ՅԱՐԱԲԵՐՈՒԹԻՒՆՆԵՐԸ ՎԵՐԱԿԱՆԳՆԵԼՈՒ ՊԱՏՐԱՍՏԱԿԱՄՈՒԹԻՒՆԸ ՄԱՏՈՒՑԵԼՈՒ մասին, բայց լսելի լինելու համար, հաւանաբար, կամ պիտի օլիգարխիկ լինես կամ չեկիստ…թէեւ գրեթէ բոլոր ստրատեգիական ծրագրերում ասածներս գոնէ հոգու խորքում ընդունել են։ Ես էլ մեր մեծ հայրերին եմ լսում, նրանց ասածներն եմ փոխանցում։ 

ԱՐՑԱԽԻ ՀԱՐՑԻՑ ԱՌԱՋ ԵՒ ԱՐՑԱԽԻ ՀԱՐՑԻՑ ՎԵՐ ԿԱՅ (ՆԱԵՒ ԱՐՑԱԽԻ ՀԱՐՑԸ ՆԵՐԱՌՈՂ) ՀԱՅԿԱԿԱՆ ՀԱՐՑ՝ ՑԵՂԱՍՊԱՆՈՒԹԵԱՆ ՀԵՏԵՒԱՆՔՆԵՐԸ ՎԵՐԱՑՆԵԼՈՒ (կամ նուազագոյնի հասցնելու) ԳԵՐԽՆԴԻՐ։ Դա հայակենտրոն մտածելակերպ է։ Դրան հակառակ մեզ պարտադրուած արցախակենտրոն մտածելակերպը ոչ միայն հայանպաստ չէ, այլեւ կարող է արցախակործան դառնալ։ Այս միտքը պէտք է մշտապէս ուղեկցի հայ պետական այրերին։

 
Category: Հայտարարություններ
Published on 19 September 2013
Print

Այսօր ԱԻՄ Ներկայացուցչական խորհուրդը (ՆԽ) քննարկեց հանրահաւաքի հարցը։ ՆԽ-ի գերակշիռ մասը կողմ էր համատեղ հանրահաւաքին։ Այնուհետեւ ես ուԿարօ Եղնուկեանը հանդիպեցինք Րաֆֆու հետ։ Մեզնից պէտք է խօսեն 2-ը (կարող են խօսել նաեւ երեքը)։ Այլ հրաւիրուածներ էլ կան։ Հարթակում հարցեր ծագելու դէպքում ես ու Րաֆֆին կամ Արմէնն ու Կարօն են որոշում կայացնում։ Քննարկեցինք նաեւ այլ հարցեր՝ բարեկամական մթնոլորտում։ Մանրամասները յետոյ։ Առայժմ արձանագրենք, որ վաղը 18։00 հրապարակում ենք։

 
Category: Հայտարարություններ
Published on 18 September 2013
Print

Քաղաքապետարանն է առաջարկում (ոչ թէ մենք ենք դիմել) հանրահաւաք անել Շառլ Ազնաւուր հրապարակում։ Րաֆֆիենք մեզ առաջարկեցին համատեղ անել Ազատութեան հրապարակում։ Համատեղ ասելով իրենք ինչ նկատի ունեն, իրենք գիտեն, բայց մենք գիտենք թէ հայերէնով համատեղ ինչ է նշանակում։ ԱԻՄ ՆԽ-ի հիմնական մասը կարծում է, որ մանրուքներից պէտք է վեր կանգնել եւ արհամարհելով այն, որ Րաֆֆի Յովհաննիսեանը բռնազավթել է հրապարակը ու մեր դիմած օրը ու նոյն ժամերին ինքն էլ հանրահաւաք ազդարարեց, գնալ իրենց ասած համատեղ հանրահաւաքին։ Վերջնական որոշմանը խոչընդոտում է այն, որ ցանկացած համատեղ գործի համար համատեղ նախապատրաստում ու կազմակերպում է տեղի ունենում։ Այ, սա արհամարհելը մի քիչ դժուար է։ Այս պահի դրութեամբ համարենք, որոշումն ընդունուած։ Նոյն օրը, նոյն ժամին Երեւանի տարբեր մասերում հաիրահաւաք անելը սխալ՝ պառակտիչ է։ Մնում է՝ գնահատական տալ ու հետաձգել մերը կամ գնալ համատեղի, ինչպիսին էլ այն լինի։

 
Category: Հայտարարություններ
Published on 16 September 2013
Print

1. ԱԻՄ ՆԽ-ը ձայների բացարձակ մեծամասնութեամբ ՀԱՒԱՆՈՒԹԻՒՆ ՏՈՒԵՑ սեպտեմբերի 5-ին ԱԻՄ առաջնորդ Հայրիկեանի ասուլիսում սեպտեմբերի 3-ի վերաբերեալ արտայատուած դիրքորոշմանը։ Տարածուած մամուլի թողարկման մէջ մասնաւորապէս ասւում է․
«․․․ Պուտինեան Ռուսաստանի ճնշման տակ Հայաստանի նախագահ Սերժ Սարգսեանը ․․․դարձել է ռուսական իմպերիալիզմի կամակատարը։
․․․ ես այսօրակ լուծումը համարում եմ անարժանապատիւ ու պարտուողական։ 
Այս ամենը կարելի էր կանխել եւ սպառնալիքներին դիմակայել հրապարակային քննարկումներով եւ հրապարակային դիւանագիտութեամբ։ Ռազմավարական նշանակութեան հարցերի քննարկման դաշտ պէտք է ներգրաւուած լիներ ողջ, նաեւ միջազգային հանրութիւնը․․․
․․․յիշեցնեենք, որ Հայաստանի պետական պաշտոնեան միայն սեփական ժողովրդի ճնշումը պէտք է օրինական համարի․․․
Այնուամենայնիւ ․․․ շեղուելու գործընթացի միայն նախնական փուլում ենք եւ մեր խնդիրն է միասնական ուժերով՝ անհատական ու հաւաքական ներդրումներով ցոյց տալ, որ սեպտեմբերի 21-ի ժառանգներն ենք, որ Աստուածատուր մեր ինքնորոշումից վեր ոչինչ չենք ընդունում»։

2. Քննարկելով բացարձակ ժողովրդավարութեան գաղափարները հրապարակայնացնելու հարցը ԱԻՄ պատասխանատուները նպատակահարմար համարեցին ստորագրահաւաքի կազմակերպումը։ Յորդորուեց բացի ԴԷՊԻ ԲԱՑԱՐՁԱԿ ԺՈՂՈՎՐԴԱՎԱՐՈՒԹԻՒՆ գրքից ստորագրահաւաքի համար ունենալ հանրամատչելի փոքրածաւալ նկարագրական ակնարկ։ Ստորագրահաւաքի պաշտոնաթղթի նախնական բովանդակութիւնը հետեւեալն է․ 
ՍՏՈՐԱԳՐԱՀԱՒԱՔ Ի ՆՊԱՍՏ ԲԱՑԱՐՁԱԿ ԺՈՂՈՎՐԴԱՎԱՐԱԿԱՆ ՀԱՄԱԿԱՐԳԻ 
Ես եմ Հայաստանի իրական տէրը եւ ձգտելով դառնալ ազատ Հայաստանի լիարժէք՝ մշտապես երկրի կառավարմանը մասնակցող քաղաքացի, պահանջում եմ Հայաստանի պետական համակարգում ներդնել Պարոյր Հայրիկեանի առաջարկած բացարձակ ժողովրդավարութեան սկզբունքները ։

Անուն Ազգանուն բնակավայր էլ. հասցէ հեռախօս ստորագրութիւն
--------------------------------------------------------------------------------------------------------------------
3. ՆԽ-ն որոշեց Ազատութեան հրապարակում հանրահաւաք հրաւիրել սեպտեմբերի 20-ին եւ այդ նպատակով պաշտոնապէս դիմել քաղա քապետարան։

 
Category: Հայտարարություններ
Published on 25 August 2013
Print
 26 օգոստոսի 2013թ. Երեւան
ՀԱՅԱՍՏԱՆԻ  ՀԱՆՐԱՊԵՏՈՒԹԵԱՆ ԳԼԽԱՒՈՐ ԴԱՏԱԽԱԶ                                                                      
                             Աղուան Յովսէփեանին
                                                                                          
 
    Հարգելի պարոն Յովսէփեան,
 
   Ձեզ գրելուս դրդապատճառն այն է, որ դատախազութեան համակարգի պաշտոնական ներկայացուցչի դիրքորոշումը 2013 թ․-ի յունուարի 31-ի գործով դատավարութեան ժամանակ  առանց վարանումի կարելի է ահաբեկչութեան խրախուսման գործողութիւն համարել։  
  
Իմ նկատմամբ մահափորձի գործով դատարանում օրերս ելոյթ ունեցած դատախազ Ամիրզադեանը պահանջեց իր կողմից մահափորձի պատուիրատու ճանաչուած  անձին  դատապարտել օրենքով նախատեսուած նուազագոյն ժամկետով։ Եւ սա այն դէպքում, երբ նշուած անձը ոչ միայն չի խոստովանել իր մեղքը, որ նշանակում է՝ չի զղջացել եւ յետագայում էլ պատրաստ է կրկին ահաբեկչութեան մասնակից դառնալ, այլեւ ամեն կերպ խոչընդոտել է գործի ամբողջական բացայայտմանը՝ հրաժարուել է ցուցմունքներ տալ ու թաքցրել է իրեն ուղորդողներին։
 
Նոյն կերպ դատախազ Ամիրզադեանը գրեթէ նուազագոյն պատժի ենթարկելու կոչ է արել յանցագործութիւնն իրականոցնողների նկատմամբ։ Երկուսն էլ որդեգրել են քննութեանը խաբելու, ճշմարտութիւնը խեղաթիւրելու պահուածք, որն արտայայտւում է նախաքննութեան ընթացքում նաեւ առերեսումների ժամանակ տուած ցուցմունքները դատաքննութեան ընթացքում փոխելու գործելակերպով։  
 
Եթէ օրէնքով նախատեսուածի նուազագոյնին են արժանանում դատական համակարգին մոլորեցնելու, իրական յանցագործներին թաքցնելու, անպատիժ թողնելու, որ նոյնն է՝ նման յանցագործութիւն կրկնելու կողմնակիցները, ապա այդ դէպքում ի՞նչ է կիրառուելու իսկապէս զղջում ապրած եւ քննութեանն օգնած մարդկանց նկատմամբ։
 
Այդպէս արագ մոռացա՞նք նախնական գնահատականները, որ «այս յանցագործութիւնն ուղղուած էր մեր անկախութեան, մեր պետականութեան, մեր ընտրական գործընթացների, Հայաստանի կայունութեան եւ ընդհանրապէս հայ ժողովրդի դէմ»։
 
Այստեղ տարօրինակն այն է, որ գլխաւոր կազմակերպիչ-պատուիրատուն՝ կատարողներին գործի մէջ ներքաշողը, պակաս մեղաւոր է նկատուել, քան կատարողները, որոնց համար դատախազը պահանջել է մէկ եւ երկու տարով աւելի ազատազրկում։ Տրամաբանական կհամարէի՞նք, եթէ Նիւրենբերգեան դատավարութեան դատապարտեալները՝ հրամաններ տուողները,  աւելի մեղմ պատժի արժանանային,  քան ստորադաս կատարողները... Չէ՞ որ այս կերպ խրախուսւում է հանցագործութեան պատուէր տալը։
 
Ես կտրականապէս բողոքում եմ Ձեր համակարգի ներկայացուցչի նման դիրքորոշման դէմ եւ կոչ եմ անում ծառայողական  մանրակրկիտ քննութեան ենթարկել նրա՝ ինչ-որ տեղ նաեւ կասկածներ ներշնչող վարքագիծը։
                                                                                              
                                                                                                         Պարոյր  Հայրիկեան
 
Category: Հայտարարություններ
Published on 22 August 2013
Print

ԲԱՐԵԿԱՄՆԵՐՍ, մէկ առ մէկ ծանոթացել եմ նախորդ գրութեանս վերաբերեալ ձեր կարծիքներին։ Շատ շնորակալ եմ եւ մոտակայ ժամանակներում դուք կտեսնեք, որ սա ձեւական շնորհակալութիւն չէ։ Բոլոր մտքերն ու տեսակետները հաշուի են առնուելու վերջնական փաստաթղթում։ Երեւի հասցրել եք նաեւ նկատել ոմանց խուճապը։ Աստուած իրենց մի քիչ խելք տայ (ԱԻՄ 6-րդ կենացն է)։ 

Հիմա ձեր ուշադրութեանն եմ ներկայացնում մէկ այլ գրութիւն, որի վերջնական տարբերակը պատրաստ կլինի եւ պաշտոնապէս կառաքուի հասցէատիրոջը 2-4 օրուա ընթացքում։ 

ՀԱՅԱՍՏԱՆԻ ԴԱՏԱԽԱԶՈՒԹԻՒՆՆ ԱՀԱԲԵԿՉՈՒԹԵԱՆ ԱՋԱԿԻՑ ԵՒ ՀՈՎԱՆԱՎՈ՞Ր

ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ԳԼԽԱՒՈՐ ԴԱՏԱԽԱԶ

Աղուան Յովսէփեանին


Հարգելի պարոն Յովսէփեան,

Ձեր ուշադրութիւնն եմ հրաւիրում դատախազութեան համակարգի պաշտոնական ներկայացուցչի դիրքորոշման վրա, որը առանց վարանման կարելի է ահաբեկչութեան խրախուսման գործողութիւն համարել։ 

Իմ նկատմամբ մահափորձի գործով դատարանում օրերս ելոյթ ունեցած դատախազ Ամիրզադեանը պահանջեց իր կողմից մահափորձի պատուիրատու ճանաչուած անձին դատապարտել օրենքով նախատեսուած նուազագոյն ժամկետով։ Եւ սա այն դէպքում, երբ նշուած անձը ոչ միայն չի խոստովանել իր մեղքը, որ նշանակում է՝ չի զղջացել, որ յետագայում էլ պատրաստ է դրամի համար կամ այլ նկատառումներով կրկին ահաբեկչութեան մասնակից դառնալ, այլեւ ամեն կերպ խոչընդոտել է գործի ամբողջկան բացայայտմանը, հրաժարուել է ցուցմունքներ տալ ու թաքցրել է գլխաւոր պատուիրատուին։ 

Նոյն կերպ դատախազ Ամիրզադեանը գրեթէ նուազագոյն պատժի ենթարկելու կոչ է արել յանցագործութիւնն իրականոցնողների նկատմամբ։ Երկուսն էլ ըստ Արմիրզադեանի որդեգրել են քննութեանը խաբելու, ճշմարտութիւնը խեղաթիւրելու պահուածք, որն արտայայտւում է նախաքննութեան ընթացքում նաեւ առերեսումների ժամանակ տուած ցուցմունքները փոխելու գործելակերպով։ Այդուհանդերձ նրանք էլ արժանացել են դատախազի առաւելագոյն բարիացակամութեանը։

Եթէ օրէնքով նախատեսուածի նուազագոյնին են արժանանում դատական համակարգին մոլորեցնելու, իրական յանցագործներին թաքցնելու, անպատիժ թողնելու, որ նոյնն է՝ նման յանցագործութիւն կրկնելու կողմնակիցները, այդ դէպքում ի՞նչ է կիրառուելու իսկապէս զղջում ապրած եւ քննութեանն օգնած մարդկանց նկատմամբ։

Այդպէս արագ մոռացանք նախնական գնահատականները, որ «այս յանցագործութիւնն ուղղուած էր մեր անկախութեան, մեր պետականութեան, մեր ընտրական գործընթացների, Հայաստանի կայունութեան եւ ընդհանրապէս հայ ժողովրդի դէմ»։ Թէ՞ դառնում ենք դրանց դաշնակիցը։ Ուրիշի՞ հետ պիտի կատարուած լիներ, որ ընտրութիւնները յետաձգեր ու հիմա միասին երգեինք «սոյուզ նեռուշիմի...» 
Այստեղ տարօրինակն այն է, որ գլխաւոր կազմակերպիչ-պատուիրատուն, կատարողներին գործի մէջ ներքաշողը պակաս մեղաւոր է նկատուել քան կատարողները, որոնց համար դատախազը պահանջել է մէկ եւ երկու տարով աւելի ազատազրկում։ Տրամաբանական կհամարէի՞նք, եթէ Նիւրենբերգեան դատավարութեան դատապարտեալները՝ հրամաններ տուողները՝ պատուիրատուները աւելի մեղմ պատժի արժանանային, քան ստորադաս կատարողները։ Չէ՞ որ այս կերպ խրախուսւում է հանցագործուկթեան պատուէր տալը։ 

ԱՄՆ նախագահ Ռեյգանի նկատմամբ 30 տարի առաջ մահափորձ իրականացնողը մինչև հիմա բանտում է․ հռոմի պապի ահաբեկչին ներեց ինքը հռոմի պապը։ Ես էլ կարող եմ ներել, բայց դատախազութեան դերն այլ է։ Այն պէտք է անաչառ հետեւողականութեամբ պայքարի հանցագորութիւնների դէմ։

Աշխարհը պայքարում է ահաբեչութեան դէմ, իսկ ՀՀ դատախազութի՞ւնը․․․ 


Աղբյուր՝ Պարոյր Հայրիեկեանի ֆեյսբուքյան էջ

 
Category: Հայտարարություններ
Published on 21 August 2013
Print

Թող մեր ազգի որեւէ թշնամի, մանաւանդ դրանց վարձկան կամ սպասաւոր չերազի, թէ ինձ կարող է շեղել իմ հիմնական գործերից։ Այսօր տպարան յանձնեցի «ԴԷՊԻ ԲԱՑԱՐՁԱԿ ԺՈՂՈՎՐԴԱՎԱՐՈՒԹԻՒՆ» գիրքս։ Ես գիտեմ դա շատ կարեւոր բան է, ոչ պակաս քան 40 տարի առաջ ասպարէզ իջեցրածս «ԱՆԿԱԽՈՒԹԻՒՆ ՀԱՆՐԱՔՈՒԷԻ ՃԱՆԱՊԱՐՀՈՎ» ծրագիրը։ 3 օրից ասուլիսում կխօսեմ դրա մասին՝ որպէս ազգային միասնական կարեւորագոյն ծրագրի։
Բարեկամներս, դուք իզուր եք ուշադրութիւն դարձնում անպատասխանատու յայտարարութիւններին։ Ցանկացած ողջախոհ մարդ ինքնորոյն էլ կտեսնի, թէ ինչպէս է փաստաբանՍիրունեանը բացայայտում իր պաշտպանեալին, կարճ ասած մինչեւ վերջ վառում նրան։ Նախ ինքը չի հերքել եւ չի էլ կարող հերքել այն, ինչ գործում ամրագրուած է երկու վկայութիւններով։ Լրագրողուհին է գրում, թէ «Սիրունեաը հերքում է»։ Սակայն նոյն լրագրողուհին մի քանի տող ներքեւում տալիս է Սիրունեանի ուղիղ խօսքը․ «...փող տվողը ինչ-որ մեկը չէ, Վարդանի ծանոթն է...» Իսկ ո՞վ է ասել, որ ծանոթ միջնորդ չի լինում։ Այսպիսով Սիրունեանը հրապարակաւ խոստովանում է, որ մահափորձից առաջ իր պաշտպանեալը 100 000 դոլար է ստացել։ 
Ուշադրութիւն դարձնենք, ծանր վիճակում յայտնուած Սեդրակեանից իր՝ եկամուտ ստանալն արդարացնել փորձող Սիրունեանի միւս խօսքերին.« Ասում է՝ (100 000-ը տուողը- Պ.Հ.) ես Վարդանին մեր գործերով փող եմ տվել․․․ Եթե չեմ սխալվում, պարտքով է տվել»,- ասաց պարոն Սիրունյանը: Մէկ տողում եւ «գործերով է փող տվել», եւ «պարտքով է տվել»․․․ Ի՞նչ գործերով է այդպիսի հսկայական գումար տրուել մի մարդու, ով ինչպէս յայտարարեց դատարանում՝ ոչ մի աշխատանքով չի զբաղւում։ 
Իսկ գլուխգործոցն այն է, որ դատարանում այդ վկային կանչելու միջնորդութեանը դէմ արտայատուած կողմը (Սիրունեանը) հանկարծ ասում է. « Ինչ վերաբերում է 100 000 ԱՄՆ դոլարին, եթե դա գործի հետ կապ ունի, թող դատարանը հրավիրի փող տվողին` ցուցմունք տալու: Մենք դրանում խնդիր չենք տեսնում»: Տեսնում էին, եւ այն էլ ինչպէս․․․ Այլապէս ինչո՞ւ իրար անցած դէմ արտայատուեցին։ Թող դրամ տուողը, նրան դրամ ուղարկողը գային դատարան եւ ցոյց տային, թէ քանի անգամ են իրենք աջ ու ձախ 100 000-ներ տուել եւ համոզէին որ դա սովորական կենցաղային մանրուք է․․․ Սիրունեանից բացի դրան որեւէ մէկը կհաւատա՞ր։ 
Ու մի բան էլ կայ, որի մասին չեմ ուզում գրել, որովհետեւ դրանից յետոյ Սիրունեանը վերջնականապէս կճանաչուի որպէս Սեդրակեանի գործը փչացնող եւ լրիւ կկորցնի նրայ վստահութիւնը իր բոլոր յետեւանքներով։ Իսկ դա իմ նպատակը չէ։ Միայն թէ հասկանայ, որ հանցագործ դրսեւորմների պաշտպանութիւնն ու շատախօսութիւնը բարեկամներ չեն։ 

Սա էլ ԱՌԱՒՈՏ-ի հրապարակումն է.
Սիրունյանը` Սեդրակյանին պատժելու Հայրիկյանի խելամիտ վարկածի մասին
Կարդացվել է 522 անգամ 1 Մեկնաբանություն Տարածել Տպել 16:42 | Օգոստոս 15 2013 

Նախագահի նախկին թեկնածու Վարդան Սեդրակյանի փաստաբան Ալեքսանդր Սիրունյանը հերքում է ԱԻՄ առաջնորդ Պարույր Հայրիկյանի պնդումը, թե 2013 թ. հունվարի 31-ին իր նկատմամբ իրականացրած մահափորձի գործի նյութերում առկա են վկայություններ, որ գործով որպես պատվիրատու հանդես եկող Վարդան Սեդրակյանը 2012թ. նոյեմբերին 100 000 ԱՄՆ դոլար է ստացել որոշակի անձից:
«Պարոն Հայրիկյան, վերջը չպարզեցիր, բա ո՞վ է սպանության պատվիրատուն, ընդունենք Սեդրակյանն է, ինչո՞ւ է արել, Սեդրակյանը շարժառիթ չի ունեցել: Ինչ վերաբերում է 100 000 ԱՄՆ դոլարին, եթե դա գործի հետ կապ ունի, թող դատարանը հրավիրի փող տվողին` ցուցմունք տալու: Մենք դրանում խնդիր չենք տեսնում: Բացի դա, փող տվողը ինչ-որ մեկը չէ, Վարդանի ծանոթն է, որը ոչ Ռուսաստանից է, ոչ «կագեբեշնիկ» է, երեւանցի նորմալ տղա է: Ասում է՝ ես Վարդանին մեր գործերով փող եմ տվել: Վարդանի հետ երկար տարիներ աշխատել են, անկապ մարդ չէ: Եթե չեմ սխալվում, պարտքով է տվել»,- ասաց պարոն Սիրունյանը:
Փաստաբանն ասաց` ինքը չի հիշում, արդյոք նախագահի թեկնածուն օրենքով պարտավորվա՞ծ է փոխառությունների մասին նշել վերջին մեկ տարվա գույքի եւ եկամուտների հայտարարագրում. «Չգիտեմ` Հայրիկյանն ինչ է շահարկում, փող են տվել, թող հարցնեն էդ մարդուն` ինչու ես փող տվել, այ ընկեր: Ես չեմ հասկանում Հայրիկյանի հարցը, թե անպատի՞ժ պետք է մնա Սեդրակյանը: Ուզում եմ հասկանալ` փող վերցնելու համար պե՞տք է պատժվի Սեդրակյանը: Վարդան Սեդրակյանին պատժելու Հայրիկյանի խելամիտ վարկա՞ծն է: Ինչի՞ համար պետք է պատժվի»:
Պարոն Սիրունյանը չցանկացավ մեկնաբանել Պարույր Հայրիկյանի գրությունը, որը պարոն Հայրիկյանը պատրաստվում է ուղարկել ՀՀ գլխավոր դատախազին. «Ուղարկում է գրությունը, որ ի՞նչ անի»:
Հիշեցնենք, որ պարոն Հայրիկյանը Facebook-ի իր էջում գրել էր, որ պատրաստվում է գրություն ուղարկել գլխավոր դատախազին, հայտնելու, որ նախագահի թեկնածու Սեդրակյանը վերջին մեկ տարվա գույքի եւ եկամուտների հայտարարագրում չի ներկայացրել իր ֆինանսական գումարներն ամբողջությամբ:
Արփինե ՍԻՄՈՆՅԱՆ



Աղբյուր՝ Պարոյր Հայրիեկեանի ֆեյսբուքյան էջ

 

Page 5 of 9

 

Որոնում

Վերջին տեսանիւթեր

?>?>