«Ազգային ինքնորոշում միավորման» առաջնորդ Պարույր Հայրիկյանը քաղաքական իրավիճակում ներկա պահին կարևոր է համարում Հայաստանի արտաքին դիրքորոշումը ռազմավարական տեսանկյունից և համոզված է, որ «և, և»-ի քաղաքականությունն անհնար է: «Ինչպես 1939թ.-ին չէիր կարող լինել և´ Հիտլերի կողմից, և´ ազատական երկրների, նույնն էլ հիմա է»,- այսօր կայացած ասուլիսին ասաց նա:

Պարույր Հայրիկյանը շեշտեց, թե հիմնական հարցը մնում է Եվրոպա, թե «խուժանամիություն». «Եվրոպան ինչո՞ւ պետք է լինի խանդավառ, Հայաստանը ցույց տվեց, որ իր իշխանություններով Հայաստանը քաղաքական բոմժի կարգավիճակում է, իսկ բոմժին ինչո՞ւ պետք է հյուրընկալեն իրենց ընտանիք: Բոմժը բոմժ է բոլորի համար»:

Այդ տեսակետից ԱԻՄ առաջնորդը գտնում է, որ ՀՀ քաղաքական կուսակցություններն իրենց ուղղակի ամոթալի և խայտառակ պահեցին: «Եթե ես մինչև վերջերս գոհունակությամբ էի նայում քաղաքական դաշտին՝ մտածելով, որ մեր երազանքներից մեկը՝ բազմակուսակցական երկիր ունենալը, իրականություն է դարձել, հիմա դա այդպես չէ: Եթե կայացած պետության մեջ պարզվում է, որ քո կուսակցությունները կուսակցություն չեն, այլ «թայֆաներ» են և մաս են կազմում մի մեծ կուսակցության՝ КГБ-ի ցանցին»,- ասաց նա և ընդգծեց, որ այդ ամենը պարտավորեցնում է ԱԻՆ-ին ավելի լուրջ ստանձնել իր պարտականությունները:

Պարույր Հայրիկյանը նաև հայտարարեց, որ շաբաթ օրն իրենք ԱԻՄ ներկայացուցիչների համահավաք կանցկացնեն, որի ընթացքում կընտրվի նոր ներկայացուցչական խորհուրդ և հենց այդ օրը ևս մեկ անգամ ցույց կտան իրենց կողմնորոշումը: «Մենք մեր համահավաքում կներկայացնենք նաև Ցեղասպանության հարյուրամյակին ներկայանալու հայեցակարգը»,-տեղեկացրեց նա:

Աղբիւր՝ Tert.am

• < Prev
• Next >